عذرا استاذى اخترت نفسى الجزاء الثانى
فضلت صاحيه لحد تانى يوم الصبح ولبست ونزلت الكليه وقابلت ايمان طبعا كان
شكلى فظيع من قلت النوم
ايمان بخضه " فى ايه يابنتى مالك عامله كده ليه "
"تعالى بس نشرب نسكافيه ... واحكيلك اللى حصل "
وفعلا قاعدت معاها وحكتلها كل حاجه
" ها ايه رايك "
" رائى فى ايه انتى بتستهبلى ....ازاى اصلا تكلميه فى وقت زى ده وكمان
تسمحيله انه يقولك كده "
"وانا اعمل ايه هو اللى كلمنى ومكنشى ينفع مردش عليه ....بجد انا
عارفه انى ممكن اكون غلطانه بس يا ايمو غصب عنى انا مكنتش عارفه اقوله ايه
..ومتنسيش انه استاذى "
"طيب وهتعملى ايه دلوقتى يا فالحه "
"مش عارفه انا حسه ان قلبى مقبوض وجايه مرعوبه انا خايفه اقابله او
اكلمه خايفه حتى اشوفه "
"ليه يعنى هو بعبع ....كبرى دماغ وبعد كده لما تفتحى الميل اعملى اوف
لاين ...وانتى اصلا مش بتكلمى عليه حد غيرى هبقى عارفه انك فاتحه وهكلمك وخلاص
"
"طيب وهعمل ايه دلوقتى ....المفروض انى هروحله عشان الجواب "
"عادى هنروح وناخد الجواب وانا هكون معاكى خليكى طبيعيه و لاكأن فى اى
حاجه "
"ماشى ربنا يسهل ....طب ياله قومى بقى عشان نخلص ونروح هموت وانام
"
"حاضر "
فعلا روحناله ووقفت ع باب مكتبه وكنت حسه ان اعصابى بايظه وخايفه جدا ايمان
عشان تدبسنى خبطت وفتحت الباب وزقتنى
"ادخلو يا بنات "
ايمان " السلام عليكم يادكتور "
"وعليكم السلام "
ايمان فضلت تتكلم معاه وانا فضلت وقفه ساكته والغريب ان هو كمان محاولشى
يوجهلى اى كلام ولا حتى يبصلى ودى حاجه نرفزتنى وخوفتنى اكتر
" دى الجوبات اللى انتم محتجانها عشان البيانات "
" شكرا يا دكتور "
ومشيت مع ايمان عشان نخروج من المكتب فجاءه سمعت كلمه وقفت قلبى
" ريم "
اخدت نفس عميق وديرت وشى وانا بشد ايمان عشان ترجع معايا
" نعم يا دكتور "
"ده الكارت بتاعى عشان لو غلسو عليكو هناك تكلمونى ع طول "
انا وانا ببلع ريقى " حاضر يا دكتور ...شكرا "
وخرجت بسرعه وكأنى كنت فى سجن
ايمان بصتلى باستغراب "انتى متاكده من اللى حكتيه ده ولا كنتى بتحلمى
"
"والله حصل "
"مش عارفه بس شيفاه عادى حتى محاولشى يكلمك وكلامه كان بالقطاره زى
العاده "
"مش عارفه ...الراجل ده شكله بيتحول "
ايمان سكتت شويه وبصتلى بجديه "ريمو الموضوع ده واحد من اتنين ياما
فعلا هو شايف الموضوع عادى وكلامه مفهوش نيه وحشه وكان بيتكلم عادى ياما الراجل ده
مش كويس راسم لنفسه شخصيه محترمه ومرعبه اوى قدام الناس بس هو من جواه مش كده وبيحاول
يستغل الشخصيه اللى راسمها لنفسه دى عشان يضحك ع الناس ويوصل لحاجات مش كويسه
"
"المفروض انك بطمنينى ولا بتخوفينى اكتر "
"مش عارفه ....بس زى مقولتلك متحوليش تكلميه تانى وهو قدامنا مش
هيحاول يعمل حاجه عشان ميشوهشى صورته .....وحتى لو طلع نيته كويسه برده ملهوش لزوم
الكلام معاه وده عشانك لان كلامه من الواضح انه بداء ياثر فيكى ....بلاش احسن يا
ريمو "
" ماشى وربنا يستر ويطلع كل خوفى ده مجرد وهم "
روحت ودخلت على اوضتى نمت زى
القتيله ومكنتش حاسه بحاجه ولا كنت عاوزه افكر فى حاجه
فات كام يوم ومفيش جديد وزى ما ايمو قالتلى كنت على طول اوف لاين بس كنت
اول لما بشوف انه فتح قلبى كان بيتخطف واجرى بسرعه اشوف انا اوف لاين ولا لاء
اول مره احس بالخوف كده مش عارفه ليه ....طول عمرى وخده الحياه بصدرى
ومبيهمنيش حد بدام مش بعمل حاجه غلط وعارفه حدودى كويس وبقدر اوقف كل واحد عن
الحدود دى
فى يوم نزلت انا وايمان عشان نجمع البيانات اللى محتجانها كان يوم متعب جدا
وطلع عنينا الحمد لله
الموظفين فى المصالح الحكوميه ناس مش طبيعين بجد كانو محسيسنا اننا جواسيس
وهناخد البيانات دى نوديها اسرائيل وهنضور بالامن القومى للبلد ههههههه ومع ان بجد لو كان فى واحد اجنبى جيه عشان ياخد البيانات دى
كانو هيحترموه اكتر من كده وهيديلو البيانات من غير وجع قلب
وفى ناس تانيه كانو بيجبولنا عرسان بجد مسخره واللى تقولك ليه يا قموره
تعبه نفسك هى البنت ليها غير بيت جوزها ...وهو ده الشعب المصرى
وفى بقى ناس عندهم بيانات من ايام قومو واقعدو ملهاش اى لزمه اصلا دلوقتى
واتغيرت كتير ورغم كده فكرين انها سر حربى لا يجب المساس بيه
وفى اخر مكان بقى كان فعلا فى بيانات مهمه جدا للبحث بتاعى والموظف غلس ع
الاخر
"حضرتك ده جواب من الجامعه وانا محتاجه البيانات دى عشان بحث "
"معلشى يا ستاذه ....اصل فى جرد وانا مش فاضى "
"حضرتك انا مش هاخد من وقت حضرتك كتير "
"تعالى بكره "
"حضرتك انا جيه من سفر ومش هينفع وفع محتاجه البيانات ضرورى "
بصلى بنرفزه " قولتلك بكره ... انا مش فاضى لعب العيال ده "
فجاءه حسيت انى مخنوقه ودموعى هتنزل عمرى متحطيت فى موقف زى ده
وايمو لما حست بيه شدتنى وخرجنا بره المكتب
" اهدى ياريمو .... تعالى نكلم الدكتور "
انا بنرفزه والدموع فى عينى "مش مكلمه حد انا هروح مش عاوزه حاجه من
وشه اصلا ...راجل غبى "
" تعالى بس وبلاش جنان ...هاتى الكارت للى دكتور علاء ادهولك "
"خدى بس انا مش هكلمه "
"متخافيش انا هكلمه "
وفعلا ايمان بعدت شويه وكلمته وقالتله اللى حصل
"طب يا ايمان هى ريم فين دلوقتى "
"وقفه اهيه بس مضايقه شويه "
"طيب خلى الموظف ده يكلمنى "
ايمان دخلت للموظف "اتفضل فى حد عاوزك "
احنا مش عارفين هو قاله ابيه بس فجاءه ملامحه اتغيرت وفضل يتاسفله جامد
ويقوله انه فالخدمه وانه مكانشى يقصدى وبقى عامل زى الكتكوت الغرقان (ناس مبتجيش
غير بالعين الحمراء)
وادى التليفون لايمان تانى
"الو "
" ايوه يا ايمان ... هو هيديكو كل البيانات متزعلوش "
"شكرا اوى دكتور "
"هى ريم فين اديهانى "
ايمان وهى بتبصلى " ريم "
شورتلها براسى لاء
"ريم اصل الموظف خدها معاه مكتب تانى عشان يديها البيانات "
"ماشى ...عموما لو حد غلس عليكو تانى ابقو كلمونى "
"حاضر يادكتور ... وشكرا اوى بجد"
"العفو ... مع السلامه "
" مع السلامه "
واخيرا اخدت البيانات بس كان نفسى اضرب الموظف ده بس ياله بقى مش مشكله
خلينى انا الاحسن
روحنا واحنا هلكانين ونمت زى القتيله لحد تانى يوم الصبح هم بيقولو انى نمت
18 ساعه بس انا ولا حسيت بحاجه
طول اليوم كنت مشغوله وبليل لما فتحت الميل لقيت اكتر من رساله منه
"ريم ابقى طمنينى عليكى "
"انتى مبقتيش بتفتحى ليه "
"عاوز اعرف جبتى البيانات المطلوبه ولا لاء "
"لما تبقى تفتحى الميل ابقى كلمنى ضرورى "
وما بين كل رساله والتانيه كام ساعه
حاجه جوايا خالتنى اعمل نفسى اون لاين مع ان كان فى حاجه جوايا برده
بتلومنى ومحسسانى انى بعمل حاجه غلط
واول لما عملت اون لاين لقيته فاتح وكلمنى على طول
" السلام عليكم "
" وعليكم السلام "
"انتى فين ؟؟ "
"موجوده "
"كنت قلقان عليكى ...عملتى ايه امبارح "
"الحمد لله جبت البيانات اللى محتجاها "
" لسه مضايقه "
" انا ... هضايق ليه ؟؟"
"ايمان قالتلى امبارح انك كنتى مضايقه عشان الموظف غلس عليكى "
" اه ... لا خلاص هو كان يوم صعب بس الحمد لله عدى "
" انا بهدلته لما عرفت انه ضايقك "
" شكرا اوى يا دكتور "
"بتشكرينى على ايه انتى متعرفيش انا بعزك قد ايه "
حسيت ان الكلام بداء ياخد مسار انا مش عاوزاه او بمعنى اصح خايفه منه
" ربنا يخليى حضرتك ....حضرتك بالنسبالى استاذى واخويا الكبير.... وشكرا
لاهتمام حضرتك "
فضل ساكت ومردش عليه
" حضرتك كنت عاوزنى ضرورى خير "
"مفيش فى ابحاث ترجمه هبعتهالك تقسميها عليكى وعلى زمايلك وترجمهالى ....
بس انا محتاجها بسرعه على الاسبوع اللى جى تكون خلصانه "
"حاضر يا دكتور ... حضرتك ابعتهالى ... وان شاء الله هنعملها ....بس
كلنا ولا انا وايمان بس "
" لا كلكم ..... عشان اللى مش معايا فالبحث هحطله دراجات اللى عندى من
خلال الترجمه دى "
"حاضر هقولهم "
وفعلا بعتهالى
" ها وصلت "
" اه وصلت "
" طيب انا هقفل بقى عشان مش فاضى ..... مع السلامه "
" مع السلامه "
وفعلا قفل على طول شويه وايمان دخلت واستغربت انى اون لاين وطبعا حكتلها
اللى حصل وشتمتنى وهزئتنى زى العاده
فات الايام وحاولت وقسمت الترجمه علينا وكان كل اتنن فى بحث وانا وايمان
طبعا مع بعض حاولنا نخلصها فى الميعاد اللى حدده عشان ميمسكشى عليا غلطه
وفعلا خلصناها وروحنا سلمناها
وبعد كام يوم كنت قاعده سهرانه وفاتحه الميل بس اوف لاين زى العاده وقاعده
بذاكر شويه والعب شويه وهكذا
وفجاءه لقيت الشات بتاعه اتفتح
" ريم قولى لزمايلك انى عاوزهم كلهم بعد بكره الساعه 11 صباحا "
وانا عشان غبيه وده العادى بتاعى وبعفويه رديت عليه
" حاضر "
وفجاءه فوقت لنفسى انى اصلا اوف لاين انا ايه اللى بهبه ده
"ايه ده انتى هنا "
انا وانا بخد نفس عميق وبشتم فى نفسى " اه"
"طيب عامله اوف لاين ليه "
"اصلى بذاكر شويه "
" اها ... طيب ربنا يوفئك ...بس المذاكره دى وخداكى مننا "
هو الراجل ده عبيط ولا بيستعبط مش فاهمه بجد
" لا ابدا "
"بقالى فتره متكلمتش معاكى ومبقتيش بتفتحى زى الاول "
"حضرتك عارف بقى المذاكر والبحث ربنا يسهل الحال وتعدى السنه دى ع خير
"
"لا متخافيش انتى ومن الطلبه المتفوقين وان شاء الله هتنجحى وانا اللى
هبقى المشرف ع رسالة الماجيستر بتاعك "
هههههههههههالراجل ده عبيط اكيد انا اصلا مش طيقاك السنه دى اروحلك برجلى
انسى ياعمر
" طبعا يادكتور ... ده شرف ليا "
وعشان اغير الموضوع " هو حضرتك عاوزنا بعد بكره ليه عشان الترجمه
"
" اه صحيح فكرتينى الترجمه وحشه جدا "
انا بصدمه " ايه بتاعتى "
" لاء بتاع زمايلك وخدنها كوبى بيست من على جوجل ومش مرتبين الجمله
حتى ... الترجمه بتاعك انتى وايمان من احسنهم مع ان فيهم بعض الغلطات الاملائيه
"
" اسفه يا دكتور بس كنت بكتب بسرعه عشان الحق اخلصها "
" ولا يهمك ...بس الباقى بشع جدا ..... متنسيش تقوليلهم على الميعاد
بس متقوليش انا عاوزهم ليه "
" حاضر يا دكتور "
وفضلت ساكته بقى ونفسى يقفل بس على مين ده سوسا وعاوز يفتح مواضيع وخلاص
"اخبار اخوكى ايه "
" الحمد لله تمام ..... انا اسفه لو غلس ع حضرتك بس مكنشى يعرف ان
حضرتك الدكتور بتاعى "
" لا ابدا ده عسل ...هو ده اخوكى الوحيد"
"لا عندى اخ كمان "
" ربنا يخليهوملك "
" ميرسى لحضرتك "
"بس غريبه "
"هو ايه اللى غريب "
"يعنى انك مش مرتبطه لحد دلوقتى ...يعنى انتى بنت جميله جدا ومحترمه
وكمان عقلك كويس جدا "
" شكرا .... بس لسه النصيب مجاش ... والدراسه اهم دلوقتى "
" انتى ايه مواصفات فتى احلامك "
بعفويه "نعم "
"ايه اضايقتى من السؤال "
انا برتباك " لا بس مستغربه "
"مستغربه من ايه "
"ان استاذ يسال طالبه عنده سؤال زى ده ...يعنى شايفه الموضوع شخصى
شويه "
"مش يمكن جيبلك عريس "
"شكرا اوى لحضرتك ....بس انا مبفكرشى فالموضوع ده دلوقتى "
"انتى زعلتى "
" لا ابدا حضرتك استاذى وانا بحترمك وبقدرك بس حياتى الشخصيه خط احمر
"
"طيب انا هقوم مع السلامه "
" مع السلامه "
كنت مبسوطه انى نسيت خوفى وقدرت ارد عليه بس خوفى بعد لحظات رجع اقوى من
اللى ممكن يحصل فى المستقبل
تانى يوم فعلا بلغتهم انه عاوزهم
وفعلا كلنا اتجمعنا عنده تانى يوم فالمكتب وكان شكله عصبى جدا
قاعد يزعق على الترجمه وان ده اهمال واستهتار وانا محاولتش ابصله خالص
وشويه وسمعت اسمى
" ريم "
قومت وقفت وقربت ع المكتب " ايوه يا دكتور "
رمى البحث بتاعى فى وشى " ايه القرف ده "
بصتله وانا مصدومه ومقدرتش ارد
"دى ترجمه دى انا لو ادتها لعيل فى ابتدائى هيعملها احسن من كده "
بحاول امسك دموعى " مالها "
" مالها ...كلها غلطات املائيه ...ايه يا ستاذه لما انتى مبتعرفيش
تكتبى بتعملى درسات عاليه ليه مش لما تتعلمى الكتابه الاول "
"بس حضرتك دى غلطات كيبورد عشان كنت بكتب بسرعه وملحقت ارجعها "
هو بعصبيه اكتر " انتى كمان بتردى عليه "
"انا اسفه "
"اتفضلو كلكم خدو الابحاث دى وتعملوها من اول وجديد ياله مش عاوز اشوف
حد فيكو قدامى "
اخدت حاجتى وجريت على بره وايمان ورايا كانت بتحاول تهدنى شويه
عدى حوالى اسبوعين كنت بروح احضر محضراتى وانشغلت فالبحث اللى خلاص هيتسلم
قريب وامتحانات اللى ع الابواب
وفى يوم قرارت انى هعمل اون لاين ومش هخاف من حد وهتكلم زى مانا عاوزه محدش
هيتحكم فيه ولا حد فى ايده مستقبلى غير ربنا وبدام مش بعضب ربنا ميهمنيش اى حد
مهما كان
وفعلا فضلت يومين اون لاين عادى وهو فاتح ومش بيكلمنى ولا انا بكلمه عادى
جدا
وتالت يوم لقيته كلمنى
" السلام عليكم "
" وعليكم السلام "
" اخبارك ايه "
" كويس "
" انتى ريم ولا اخوها "
" لا انا ريم "
" طيب ليه بتقولى كويس مش كويسه "
" عادى يعنى "
" شكلك مضايق .... فى حاجه "
" لا ابدا مفييش حاجه "
" بس انا حاسس انك زعلانه "
" قولت مش مضايقه "
"اها انا اسف انى بدخل فى حياتك الشخصيه عموما انا حاسس ان انا وانتى
مش مرتاحين مع بعض وشايف انك تغيرينى وتحولى لدكتور عبد الله احسن "
" لا انا اللى اسفه من الواضح
انى نسيت نفسى وانى بكلم استاذى المفروض انى اكلم حضرتك بطريقه احسن من كده "
" لا ولا يهمك ...وانا يهمنى راحتك ومش عاوزك تعملى حاجه غصب عنك
"
" لا ابدا انا خلصت للبحث تقريبا وهسلمه الاسبوع اللى جى "
"اوكى ربنا يوفئك ... سلام "
" سلام "
ودى كانت اخر مره يكلمنى فيها وعدت الايام وسلمت البحث وانشغلت فالامتحانات
وبعد حوالى شهرين ظهرت النتيجه
روحت انا وايمان عشان اشوف النتيجه وكانت
ان ايمان نجحت وانا سقط ولما سالت عرفت انى منجحتش فى مادة البحث
ايمان كان زعلانه عشان ومش حسه بنجحها وانا كنت فرحانه عشانها ايمان كانت
مستغربانى جدا
" ها يا ايمو ياله انا عزماكى ع الغداء "
" ريم انتى طبيعيه "
" اه ليه "
" انتى مش زعلانه ان تعبك راح ع الارض "
"بصى يا ايمان انا صحيح خسرت حلمى بس كسبت نفسى انتى عارفه ...انا حسه
براحه غير طبيعيه ومبسوطه جدا ....يمكن عدم نجاحى حسيسنى انى كنت صح وانه فع انسان
مش كويس ولا محترم ومش ندمانه على اى حاجه عملتها صحيح دى اكتر سنه تعبت فيها بس
كمان اتعلمت منها اوى .... وبقيت وثقه فى نفسى اكتر واكتر "
" انتى مجنونه على فكره "
" ههههههههه قولى حاجه جديده "
" وناويه على ايه "
" ناويه احلم تانى واحاول تانى واتعلم تانى وافشل او انجح المهم انى
اكسب نفسى ومخسرهاش عمرى مهضحى بنفسى عشان حلم "
"طيب لسه ناويه ع العزومه ولا هتخلعى "
" هههههههههه لا ناويه ... ها تكلى ايه "
وفضلنا طول اليوم مع بعض نضحك ونهزر
ليست هناك تعليقات:
إرسال تعليق