عذرا استاذى اختارت نفسى
انا زى اى بنت عادى مقبله على الحياه شايفه الدنيا بسيطه وسهله متفائله
والامل ملينى وبحلم وكان كل حلمى انى احقق احلامى كنت شايفه الدنيا بمبى والمستقبل
مستنينى ومطموحى كبير وحلمى فى شغلى وحياتى العمليه كان اكبر
بس نسيت وانا بحلم افتكر انى عايشه فى مجتمع ذكورى متخلف وبيقتل اى حلم لاى
بنت باسم انها بنت
كنت بحب مجال دراستى جدا وقدرت اتفوق فيه ع قد مقدر والدكاتره كانو ميتوصوش
فى زرع الوهم جوانا
انتم احسن قسم انتم اهم ناس فالبشريه من غيركم لا يصلح الكون شعارات خلقت
جوانا احلام حلوه اننا ممكن فعلا ننفع غيرنا ونصلح الكون اللى اتشقلب حاله
انا اداب جغرافيا شعبة مساحه المفروض انى مهندسة مساحه عارفه كتير هيستغرب
وهيقولو ايه المساحه دى وناس تانيه هتتريق وهتقول مساحه ولا مقشه بس عادى بقى عندى
مناعه من التريقه
المهم الدكاتره فالكليه كانو مفهمنا اننا هنتخرج ونلاقى الناس والشركات
بتخطفنا خطف وكمان بمرتبات خياله .....مش هقدر اقول انهم كدبو علينا هو كلامهم كان
صح جدا بس نسو حاجه صغيره اوى وهى ان كل الوظايف دى " للرجال فقط"
معلشى بقى اصلهم خايفين على البنات الحلوين القمرات اللى زينا عشان تقريبا
معظم شغلنا فى مناطق نائيه وصحراء
مش هقول انهم غلطنين بس مكنوش يعيشونا الوهم ... وادى اول حلم حلمته ادمر
بس ايه انا ولا يهمنى هحلم تانى وهحقق حلمى ان شاء الله
حلمت انى اكمل دراستى وخصوصا انى بحب مجال دراستى وفعلا قرارت انى اقدام
دراسات عاليه بس طبعا مينفعشى اقدم لوحدى عشان كده جريت على التليفون
" السلام عليكم .....ايمو حبيبتى "
" ازيك يا ريمو ...اخبارك ايه وحشتينى "
" وانتى كمان ....بقولك "
" قولى خير ..."
" انا زهقت من القاعده فالبيت متيجى نقدم تمهيدى ماجيستير "
"ايه ...لا طبعا انسى انا مصدقت اخلص دراسه وامتحانات "
" يابنتى اسمعينى بس ....الشغل وبخ ومش لقين حاجه نعمله كورسات وخدنا
..وقاعدت البيت ممله اوى "
"ايوه بس .."
"من غير بس ....خليكى جدعه بقى انا مش عاوزه اقدم لوحدى .. وبعدين مش
هنخسر حاجه .... عشان خاطرى بقى "
وطبعا انا لا اقاوم واقنعتها انها تقدم معايا اصل ايمو دى الانتيم بتاعى
بنت جدعه جدا وصاحبه بجد وبعتبرها اخت ليه مش مجرد صاحبه وبس
وفعلا بعد اسبوع كنا فى الكليه وبنكتب طلب التسجيل وكنت فرحانه جدا انى
هعمل حاجه مفيده وهبداء حلم جديد واحقق نفسى فيه
وتعدى بينا الايام وبداءنا نحضر ونلتزم كنا بس 12 طالب وطالبه كانو كلهم
اكبر مننا بس قدرنا نتاقلم معهم ونساعد بعض
واللى بيقدر ع حاجه كان بيعملها للتانى كنا كلنا اخوات واصحاب كنت مبسوطه
وانا رايحه الكليه وحسه بالفخر كده انى مش طالبه عادى لا ده انا طالبه دراسات
عاليه
لحد ما فيوم عرفنا حاجه ديقتنا كلنا ان مادة البحث اللى هى اهم ماده هتبقى
تحت اشراف اتنين دكاتره واحنا علينا الاختيار
الاول كان طيب اوى بس زياده عن اللزوم والبحث معاه هيبقى نظرى اوى يعنى
هيبقى فالبطاطس والخيار والزراعه وكده وده طبعا حاجه مكنتش حباها انا عاوزه اتعلم
وحابه مجال المساحه مش الزراعه انا مهندسه مش فلاحه وكمان مش بحب النظرى انا عاوزه
حاجه عمليه
التانى بقى كان اكتر دكتور بنخاف منه وبنكرهه فالكليه من سنه اولى لحد سنه
ربعه عصبى ومغرور والجدع اللى كان يجيب مقبول فى مادته بس بصراحه برده انه بيشتغل
صح وبيحب كل حاجه تبقى مظبوطه وعمليه اكتر
طبعا الكل جرى وسجل مع الدكتور اول وفضلت انا وايمو نبص لبعض
" بقولك ايه يا ريمو بلاش جنان.... انا هختار دكتور عبد الله "
"يابنتى افهمينى دكتور عبد الله معتمد على الحاجات النظريه اوى وانا
مش حبه ده "
" مش احسن من علاء .....انا بترعب منه "
" يعنى انا اللى بموت فيه ... بس هو اللى هيعلمنا صح "
"صح غلط ...انا مش سجل معاه "
"يا ايمو وانا مش هدرس الخيار بيتزرع امتى والسكر بيتصنع فين ...خليكى
جدعه بقى "
"يابنتى انا جدعه بس مش مجنونه .....دول اللى اكبر مننا فكرو بعقل
وخلعو منه ... احنا بقى ندبس معاه "
"يانبتى دى احسن حاجه عشان انا وانتى بس نكون معاه ونشتغل صح بقى
ومتنسيش ان البحث ده مقدمه لرسالة الماجيستير .....انا عاوز اتعلم مش ادلع وخلاص
"
"انا اللى جبت ده كله لنفسى انا ايه اللى خلانى اسمع كلامك اصلا من
الاول "
" خلاص زى مسمعتى فالاول تسمعى فالاخر ..... ياله بقى عشان نروح نكتب
اسمنا مع دكتور علاء"
مشت معايا وهى على مضض طبعا مش طيقانى بس مش هتزعلنى برده دى ايمو دى حبيبت
قلبى من جواه
وفعلا عملت اللى فدماغ وسجلنا معاه
فاتت الايام بدانا نتعود عليه صحيح كنا برده بنخاف منه بس مكنشى مرعب
للدرجه كان بيتكلم عادى وبيسمعنا وبيحاول يفدنا ويساعدنا كتير وفى يوم كنا قاعدين
معاه فالمكتب
"صحيح يا بنات كنت عاوز ميل وحده فيكو عشان ابعتلكم ابحاث مهمه هتفدكو
"
طبعا ايمو عملت عبيطه وبتكتب فالكشكول وبصتله لقيته بيبص عليه
"اكتبى ميلك هنا .... مش عندك ميل برده ولا ءلا "
بارتباك وببلع ريقى بصعوبه " اه طبعا عندى "
وفعلا كتبته وبصيت لايمو اللى كانت بتضحك من تحت لتحت ودوست على رجلها
وعدى كام يوم وانا افتح الميل عشان اشوف بعت الابحاث ولا لاء ملقيش بعت
حاجه وقفل تانى
لحد ما فى يوم
كنت قاعده وفاتحه الميل وبعدين قومت اعمل حاجات فالمطبخ واخويا قاعد مكانى
وشويه ولقى حد فتح الشات وبيتكلم كلمه ع انه وحده صاحبتى وهزر معاه شويه ...اخويا
كان هيودينى فى دهيه ميعرفشى ان ده مبيهزرش
المهم شويه ودخلت ولقيت الكارثه
وانا مبرقه " انت بتعمل ايه "
" مش عارف وحده صاحبتك اسمها علا باين وقولتلها انك فالمطبخ"
"صاحبتى ايه هتودينى فى داهيه ...ده الدكتور بتاعى انا لو سقط هتبقى
انت السبب"
وقاعدت شويه اخد نفسى واشوف هصلح الكارثه دى ازاى
ودخلت بقى وجمدت قلبى
"السلام عليكم "
"وعليكم السلام ... ريم ولا اخوها "
" لا يا دكتور انا ريم ... انا اسفه اوى على اللى حصل اصل اخويا
الصغير وميعرفشى حضرتك "
"ولا يهمك "
وفجاءه لقيت ايموشن اسميل J
انا وقفت تنحت هو الراجل ده بيتحول ولا ايه انا عمرى ما شوفته بيضحك
وبعدين قولت عادى بقى
"حضرتك الابحاث لسه موصلتنيش"
"اه انا نسيت ابعتهالك ...هبعتهالك دلوقتى "
وفعلا بعتها
" ها وصلت "
"اه وصلت شكرا جدا لحضرتك "
" على ايه ولو احتاجتى اى حاجه انتى وايمان انا موجود"
"شكرا ....انا هقفل بقى بعد اذن حضرتك "
" ماشى ... مع السلامه "
" مع السلامه "
وفعلا قفلت وعدت ايام ومفيش جديد بحاول اجمع معلومات عن البحث بتاعى وبحضر
محضراتى والحياه ماشيه جميله ورغم تعبى اللى تقريبا متعبتهوش فالسنين اللى فاتت دى
فالدراسه كنت حبه جدا التعب ده ومبسوطه بيه
وفى يوم كنت سهرانه وبكلم ايمان على الميل وشويه ودخلت هى نامت وانا فضلت
فاتحه شويه وبعد فتره من الملل والزهق قرات اقفل وادخل انام بس فجاءه لقيت حد فتح
الشات وكان الحد هو طبعا استغربت وخصوصا ان الوقت كان متاخر قرب الفجر
" السلام عليكم"
" وعليكم السلام "
" ازيك "
"الحمد لله تمام "
"يارب دايما .... سهرانه ليه لحد دلوقتى "
"مفيش كنت بذاكر شويه قولت هستنى الفجر وانام "
" طيب مش انتى لقتينى فاتح مش بتكلمينى ليه "
فضلت ساكته شويه ومش عارفه ارد وحسه ان فى حاجه غلط
"يعنى محبتشى اضايق حضرتك ..اكيد حضرتك مشغول "
"اخبار البحث بتاعك ايه "
"تمام بس فى بيانات كتير مش عارفه اجابها .... الحصول على بيانات فى
مصر مستحيل "
"اها انا عارف ان الموضوع صعب شويه ...بكره تعاليلى المكتب هديكى جواب
للجهاز المركزى للتعبئه والاحصاء هيفيدك كتير فى بحثك "
"شكرا جدا يا دكتور "
"على ايه انتى ناسيه انى المشرف على البحث يعنى ده واجب عليه "
"شكرا لحضرتك "
وفضلت ساكته شويه وفكرت اكتب انى هقوم عشان انام حجه والسلام عشان اقفل بس
لحظت انه بيكتب حاجه استنيت اشوف هيقول ايه يمكن هيقفل وتبقى جات منه هو
بس للاسف مكنشى كده
" ممكن اسالك سؤال "
كنت بتنفس بصعوبه من الخوف والقلق " اتفضل حضرتك "
"انتى حلمك ايه "
"حلمى ياااااه سؤال صعب اوى "
" ليه "
"عشان احلامى معظم الوقت بتتحول لهواء فبلد غريبه عايشه فيها وشايفه
ان البنت مش من حقها تحلم "
"ليه بتقولى كده "
"اكبر دليل فالكليه ياما الدكاتره كلمونا على الشغل ومستقبل القسم
بتاعنا وفالاخر طلع كلامهم للولاد بس والشغل كله للرجال فقط"
"طيب مانتى ممكن تشتغلى شغل مكتبى مش لازم شغل مواقع وكده"
"حضرتك برده اخدت كل الكرسات عشان كده بس معظم الشركات اللى هنا صغير
واللى بيعمل الشغل الميدانى بيعمل شغل المكتب ولو حابه شركه كبيره هتبقى فى
القاهره والاسكندريه وهنرجع تانى انى بنت ومينفعشى اسافر كتير او اعيش لوحدى
....للاسف هو ده وضع البلد والمجتمع اللى عايشين فيه "
"واضح من كلامك انك متمرده "
" انا خالص بالعكس انا واقعيه "
"انتى حبيتى قبل كده ؟؟"
بصيت للجمل كتير وحسيت ان قلبى اتخطف هو اكيد كتبها بالغلط هو سؤال عادى
وانا مكبره الوضوع ولا مش عادى
انا مبقتشى فاهمه حاجه بس متاكده ان فى حاجه غلط
وفضلت ساكته شويه وهو لاحظ سكوتى وكنت حسه انه شايف خضتى
" ايه هو سؤال صعب "
"لاء"
"لاء ايه.؟؟ "
"لاء محبتشى قبل كده "
"يمكن عشان كده حسه بان الدنيا مش حلوه...انتى عارفه لو حبيتى نظرتك
هتتغير "
"بالعكس انا متفائله وحسه ان الدنيا جميله ... ومهما كان حلمى مش
بيكمل مش هيأس وهحلم تانى بدام لسه عايشه "
"ماشى يا متمرده"
"انا شايفه ان التمرد حاجه كويسه ... وانى مفضلشى قابله بالظروف اللى
حواليه بضعف "
" بس انا محبكيش انك تكونى متمرده "
كل مره يتكلم فيها يصدمنى ويلخبطنى انت عاوز منى ايه
انقذنى وقتها صوت الاذان كنت حاسه انها حاجه من ربنا عشان يخلصنى من الوضع
البشع اللى محطوطه فيه ده
" بعد اذن حضرتك ...الفجر اذان "
"هتصلى وتنامى و هتفتحى تانى "
بدون تردد " لا هنام "
"طيب تصبحى على خير "
"وحضرتك من اهله ....مع السلامه "
" مع السلامه "
قومت وانا حسه ان قلبى مقبوض صليت وحاولت انام بس معرفتش انام من كتر
التفكير كنت بلوم نفسى انى سمحتله انه يدخل فى حياتى بالطريقه دى بس فى نفس الوقت
خوفى منه ومن وضعه خوفنى انى اعترض او اديله كلمتين و اوقفه عند حده زى مكنت بعمل
مع اى حد بيتجراء عليه بس ازاى ده الدكتور بتاعى واحترامه واجب ...بس احترمه ازاى
وهو محترامشى سنه ووضعه وادخل بالطريقه دى فى حياتى ...يمكن هو شايف انه كده عادى
وميكونشى فى نيته اى حاجه وحشه مش عارفه
اه يادماغى تعبتينى من كتر التفكير واه يا قلبى حساك مقبوض ومخطوف اوى
ونكمل الجزاء التانى
ليست هناك تعليقات:
إرسال تعليق