انا وهو والفيس بوك الجزء الاخير

انا وهو والفيس بوك
الجزء الاخير
وفى يوم جيه قالى
" انا كلمت ماما عنك "
انا باستغراب" عنى انا "
" اه ...قولتلها فى بنت بحبها وعاوز اخطبها "
انا بصدمه " نعم "
" نعم ايه "
" تخطب مين ؟"
" اخطبك انتى "
"انت بقرار من دماغك "
" عادى اعتبرينى عريس زى اى عريس بيتقدملك .. انتى مش كان بيجيلك عرسان وبتقبليهم بس مش بيحصل نصيب "
" اه ... بس ازاى برده "
"انتى عارفه انى مسافر بره ..كلمت ماما عشان تيجى هى واخواتى وتقدمولك ولما اجى اخر السنه هنعمل خطوبه وكتب كتاب "
" انا مش قادره استوعب اللى انت بتقوله "
" طب اعملك ايه انا غلبت معاكى ومع دماغك النشفه .. انا بحبك بحبك والله العظيم بحبك انتى ليه بتعملى فيه كده .. انتى لو قصده تعذبينى مش هتعملى كده... بقولك اعتبرينى واحد غريب وعاوز يتقدملك ايه المشكله فى كده ... هو انا غلطان عشان عاوز ادخل البيت من الباب "
" طيب بس براحه انا مش قصدى اضايقك بس بجد مش فاهمه ... انت من بلد وانا من بلد ده غير انك مش موجود اصلا .. هقول لاهلى ايه و وعرفتك ازاى وكمان انا مش عارفه هيوافقو ع الوضع ده ولا لاء "
"كل اللى طلبه منك انك تكلمى اهلك وبس "
" طيب انت متاكد من قرارك ده يعنى انت متعرفنيش كويس ولا شوفتينى ولا حتى تعرف شكلى ايه ازاى متاكد اوى من مشاعرك وانك تاخد قرار زى ده "
" انا لما حبيتك حبيت شخصيتك وشكلك مش هيفرق معايا كتير مع انى متاكد انك اجمل بنت ف الدنيا ... كل اللى انا طلبه منك انك تكلمى اهلك او حتى مامتك ولو عاوزه تكلمنى او تعرف اى حاجه عنى انا ممكن اكلمها سكاى معنديش اى مشكله وانا هقنعها متقلقيش "
"اوكى ... هشوف وهرد عليك بكره.. وربنا يسهل "
" ان شاء الله خير "
" ان شاء الله ..ياله سلام بقى "
" استنى "
" خير "
" بحبــــــــــــــك "
" طيب "
" هههههههه بحبك برده ...ياله سلام "
" سلام "
كنت متلخبطه ومش عارفه اعمل ايه بس بصراحه كان عجبنى اصراره عليه يمكن حسيت انه بيحبنى فعلا ومتمسك بيه ودى اكتر حاجه كانت بتخلى قلبى يدق بس كنت متوتره ومش عارفه افتح الموضوع ده مع ماما ازاى ولا اقولها ايه
تانى يوم صحيت زى العاده فطرت وفضلت قاعده معاها
ماما باستغراب : خير قاعده معايا ليه
انا : عادى يعنى يمكن محتاجه حاجه ... اساعدك
ماما وهى مبرقه : نعم ... من امتى ؟ ..قولى قولى عاوزه ايه  
انا : عادى يعنى هو انا لازم اكون عاوزه حاجه
ماما : اه بنتى من زمان وحفظاكى ... قولى فى ايه
انا بتردد : بصراحه كده ... هو يعنى .. هو فى
ماما بقلق : فى ايه .. متتكلمى
انا : فى واحد اعرفه من ع النت عاوز يتقدملى
ماما وهى متنحه : واحد ... ازاى يعنى ... وتعرفيه منين
انا : انا هكيلك كل حاجه
وبدأت احكلها كل اللى حصل
انا : والله يا ماما انا معملتش حاجه غلط وكلمنا كله كان عادى ... بس لقيته امبارح بيقولى انا عاوز يتقدملك
ماما بضيق :لا غلطتى .. بس ده مش موضوعنا دلوقتى ... ادخلى كلميه عاوزه اكلمه
انا وانا ببص فالساعه : مش دلوقتى هو فى الشغل
ماما : ماشى لما تكلميه نديلى
انا بضيق من طريقه كلام ماما ليه  : طيب
وسابتنى ودخلت ع المطبخ
انا دخلت ع اوضتى وانا حسه بخنقه و قلق ياترى ايه اللى هيحصل وماما هتقوله ايه
اترميت ع السرير وانا بكلم نفسى " انا تعبت من كتر الحيره وكتر التفكير اللى انا فيه ... انا هسيبها ع ربنا وان شاء الله خير "
وفى نفس ميعاد كل يوم فتحت الفيس ودخلت ع الجروب وكتبت
" انت هنا "
رد عليه " اه ... هنا "
" ماما عاوزه تكلمك "
" انتى كلمتيها "
" اه "
 " اوكى مفيش مشكله .. هاتى اميل الاسكاى بتاعك "
" اوكى "
 وكتبتهوله
" تمام ... افتحى بقى "
" حاضر ثوانى ... هنده لماما بس "
 خرجت نديت ماما وفهمتها هتعمل ايه
انا : بصى ياماما تقبلى المكالمه من هنا .. وانا مشغله السماعات
ماما :انتى مش معايا اعملى انتى ... انا هتكلم بس
انا : لاء انا هخروج لحد متكلميه
ماما باستغراب : ليه
انا : كده ..هستناكى بره لحد متخلصى معاه
ماما : لاء ... استنى عاوزاكى تسمعى الكلام اللى هيتقال
انا بتردد : بس
ماما : من غير بس ... اقعدى هنا ع السرير ومتتكلميش خالص وانا مش هقوله انك هنا
فتحت الاسكاى وهو رن عليه وفتحت المكلمه من غير متكلم وشغلت السماعه الاساسيه عشان اسمع هو هيقول ايه
هو : السلام عليكم
اول ما سمعت صوته قلبى دق جامد ووشى احمر كنت حسه انه مطلع حراره
ماما : وعليكم السلام  
هو : ازى حضرتك يا طنط ... عامله ايه ؟
ماما : الحمد لله كله تمام
هو :يارب دايما
ماما بدون لف ولا دوران  : خير يا بنى موضوع ايه اللى عاوزنى فيه
هو بارتباك : بصراحه يا طنط .. انا اتعرفت ع بنت حضرتك ع الفيس واعجبت بيها وبشخصيتها وحابب ارتبط بيها
ماما بحده : بس اللى عرفته يا ابنى انك بره مصر هترتبط ازاى ع النت برده زى متعرفتو
هو : حضرتك دى حاجه مؤقته لحد منزل اجازه وممكن حاليا اهلى يجو يتقدمو رسمى وانا موافق ع كل طلابتكم
ماما : بس يا ابنى انا مش مقتنع بكل الكلام ده
هو بضيق : ليه بس حضرتك
ماما : لانه مش منطقى انت ولا شوفتها ولا تعرفها متقنعنيش انك اعجبت بيها بشويه كلام مكتوب ده غير انك من بلد تانيه وانا  ماحبش ان بنتى تعيش بعيد عنى
هو : حضرتك انا معجب بشخصيتها اللى بانتلى من كذا موقف وبحترمها جدا وحابب شخصيتها وتفكيرها وموضوع البلد التانيه فانا كده كده بشتغل فالسعوديه وهنعيش هناك وانا عندى شقه فالبلد هجهزها ونقعد فيها فالاجازات بس لو حضرتك عاوزانى اجبلها شقه تانيه فالمنصوره انا معنديش مشكله
ماما بتنهيده : والله يا ابنى مش عارفه اقولك ايه ...انا هصلى استخاره واشوف بنتى رائيها ايه وهرد عليك واللى فيه الخير ربنا يكتبه
هو : ان شاء الله... طب ممكن طلب
ماما : اتفضل
هو : ممكن اكلمها
انا بسرعه وارتباك شاورت لماما ب لا
ماما : اصل .. اصل هى مش هنا قاعده مع باباها بره
هو : اوكى ... سلام حضرتك
ماما : مع السلامه
وروحت بسرعه قفلت
ماما : مردتيش تكلميه ليه
انا : مش عارفه ... بس مش عاوزه
ماما : طيب صلى استخاره وفكرى كويس انا وثقه فيكى وفى تفكيرك ... ومستنيه تردى عليه قبل مكلم ابوكى
انا : حاضر
وخرجت ماما بره وانا قاعدت وفتحت الفيس لقيته كاتب بوست
" جبانه كنت عارف انك موجوده "
انا بارتباك " عرفت ازاى ... وبعد ين انا مش جبانه"
هو " لا جبانه وخوفتى تكلمينى ... كنت عاوز اسمع صوتك "
"لما ربنا يسهل والموضوع يكمل ع خير ابقى اسمعه براحتك "
هو " ان شاء الله "
وفضلنا نتكلم شويه وبعدين قفل عشان ينام وانا قومت اتوضيت وصليت استخاره ودعيت ربنا انه لو خير ليا ربنا يقدمه منى ولو شر ربنا يبعده عنى
ودخلت نمت
تانى يوم
فتحت الفيس وفضلت قاعده مستنيه يفتح بس مفتحشى ولا كان فى اى بوست او تعليق منه وفتحت الخاص وبعتله رساله
"انت كويس فينك انهارده لما تفتح طمنى عليك "
بس لحد ما نمت مفتحشى ولا رد عليه
وهكذا تانى يوم وثالث يوم وفضل الوضع ده اسبوع
ولا بيرد ع رسايلى ولا بيدخل الجروب ولا بيعلق ولا اى حاجه
كنت مستغربه ومحتاره وقلقانه من اختفائه ده حاجه خلتنى ادخل صفحته يمكن حصل حاجه
دخلت وكانت الصدمه
كان منزل لسه بوست من دقايق وبوستات تانيه كتير الايام اللى فاتت وبيعلق وبيهزر وبيتكلم عادى مع اصحابهوكمان فى بنات كتير وبيهزر معاهم وبيقولهم كلام مينفعشى
كنت ببص وانا مش مصدقه بجد والغريبه انى بدل معيط او احس بوجع فضلت اضحك جاتلى هسترية ضحك
قد ايه انا كنت هبله ...قد ايه كنت صح بس هو كان بيقنعنى بالغلط ...قد ايه ربنا بيحبنى وبعده عنى لانه اكبر شر ...قد ايه ماما كان عندها حق
بس اكتر حاجه جات فى بالى هو ليه عمل كده ليه حاول يقنعنى بحاجه انا مش مقتنعه بيها عشان يوجعنى
كان هيستفاد ايه ..هيرضى غروره مثلا ... هينبسط بكسر قلوب الناس ... ربنا يهدى النفوس يارب
اخدت نفس عميق وقفلت صفحته وعملتله بلوك وخرجت من الجروب وقفلت الفيس ودخلت اتوضيت وصليت ركعتين شكر لربنا
وروحت لماما وانا بجد حسه براحه وفرحه مش طبيعيه
انا : ماما مش محتاجانى اساعدك فى حاجه
ماما : عاوزه ايه قولى
انا بابتسامه : بجد مش عاوزه حاجه ... بس زهقت من الفيس بقولك ايه متيجى نخروج
ماما : بجد ... ده انقلاب بقى
انا : يعنى تغير ... ياله انا هلبس وانتى ياله وهننزل نتمشى شويه
ماما بفرحه : ماشى ياله
وفعلا نزلت انا وماما واحنا ماشين
ماما : مقولتليش عملتى ايه فى موضوع العريس بتاع الفيس
انا : عادى بخ
ماما باستغراب : بخ
انا : هههههه يعنى خلاص خلص
ماما بابتسامه : كنت عارفه انه هيبقى بخ ... بنتى وحفظاكى ..طب بزمتك كنتى مقتنعه
انا وبثقه : لاء
ماما باستغراب : امال  خلتينى اكلمه ليه
انا : مش عارفه يمكن كنت حبه اصراره عليه وتمسكه بس هو كشخص مقدرشى اقولك حاجه عنه لانى معرفهوش ...بس انتى عارفه يا ماما انى اتعلمت من الموقف ده
ماما : اتعلمتى ايه
انا : انى اثق فى نفسى وفى مبادئى ومغيرهاش مهما حصل واعمل اللى مقتنعه بيه ومتأثرشى بكلام اى حد لو مش مقتنعه بيه ...واسمع كلام قلبى وعقلى ... انتى متعرفيش انا قلبى مرتاح قد ايه دلوقتى ...الاول لما كنت بكلمه كنت بحس بدقه فى قلبى كنت فكرها دقه من الحب بس اكتشفت ان قلبى كان بينقبض مش بيدق ... الحب اكيد مش كده ...صحيح لسه محستهوش بس مش هستعجل عشان لما يجيلى احس بيه اوى وافرح بيه اوى ... مش عاوزه اعلق قلبى بمجرد وهم
ماما بفرحه : ربنا يفرح قلبك يا حبيبتى ... وافرح بيكى قريب
انا : ان شاء الله يا ماما
تمت 

SKOBY