انا العروسه
زغريط وهيسه واغانى شغاله بصوت عالى والنور مالى الشارع
والناس دخله طلعه بيهنو ويباركو
كنت قاعده متنحه يمكن
ويمكن كمان مبلمه مش فاهمه هو ايه اللى بيحصل ده
انا مش بحب الهيسه انا ايه اللى مقعدنى هنا
ولا كمان بحب الاغانى الشعبى
هو ايه الكلام الغريب اللى بيتقال فى الاغنيه دى
اه يابت ياخايبه
اعصابك سايبه
وسايبه نفسك
وفى غرامه دايبه
بالذمه دى اغنيه تشتغل انا حسه اصلا ان بوليس الاداب هيدخل علينا دلوقتى من
كلام الاغنيه
ولا البنات اللى بيرقصو كنت بصراحه مستغربه يعنى هم بيعملو كده ازاى
اصل انا معرفشى اى حاجه عن الرقص
كنت بقول لنفسى هم بيحركو ايه جواه عشان بره يتحرك كده
يعنى فين بيودى لفين !
ايه الهبل اللى انا بقوله ده
انا اتفرج وانا سكته وخلاص
شويه ودخلو ستات كبار معرفهمشى وفجاءه انقضو عليه وهاتيك بوس واحضان لما
فرهدونى
" مبروك يا عروسه ... مبروك يا عروسه .... ربنا يتمملك ع خير يا عروسه
... ايه الحلاوه دى يا عروسه "
ايه كمية كلمه عروسه اللى فالكلام ده
وبعدين عروسه ... هى مين اللى عروسه !
وفجاءه لقيت وحده صحبتى بتشدينى "ياله عشان ترقصى "
اكيد بتهزر اكيد لاء طبعا
" لاء مش هينفع ... انا اصلا مش بعرف "
" ازاى يعنى ... انتى العروسه ولازم ترقصى "
عروسه تانى الناس دى اتجننت ولا ايه
اه صحيح تصدقو فعلا
ده انا العروسه
تصدقو كنت نسيت
بصراحه كده لسه مش مستوعباها ازاى يعنى العروسه لسه مش متخيلها خالص
مشاعرى كلها متلخبطه ومش فاهمه انا
حسه بايه
فرحانه ولا زعلانه مضايقه ولا مبسوطه بس الاكيد انى متوتر وقلقانه
فضلت قاعده مكانى ببص لكل الناس باستغراب والابتسامه ماليه وشى مهو انا
فرحانه اكيد عشان اخيراااا هبقى مع حبيبى فى بيت واحد
يعنى هشوفه كل يوم وهتكلم معاه براحتى هحضرله اكله وهغسله وهكويله لبسه
هصحيه الصبح عشان شغله وهصلى معاه وهيكون امامى هسهر بليل وانا نايمه فى حضنه
بنتفرج على التلفزيون
حاجات كتير ياما حلمت اعملها معاه
بس برده مش قادره استوعب الكلمه " عروسه ... عروسه ... عروسه "
ما علينا خلينى اعيش الحلم شويه وابقى عروسه بقى
فضلت اصقف مع اصحابى وهم بيرقصو اه مهو اعيش الحلم بس ده برده مش معناه انى
ارقص اخرى انى اصقف وبس
فاتت كام ساعه الناس بداءت تقل وانا خلاص فصلت وتعبت
كان يوم متعب بجد بس برده مفرح مقدرشى انكر
ماما قربت عليه بحب " يا له ياحبيتى ادخلى انتى نامى بقى وريحى جسمك
عشان بكره يوم طويل "
" حاضر ياماما .. تصبحى ع خير "
ماما بابتسامه " وانتى من اهل الخير يا عروسه "
برده عروسه حتى انتى يا ماما
كل اعوانك خانوك يا ريتشارد
دخلت اوضتى غيرت هدومى ونمت على سريرى حاولت انام بس معرفتش
قومت اتعدلت على السرير واخدت دبدوبى فى حضنى وبصيت على حيطان اوضتى بابتسامه
حزينه
"يعنى الليله اخر لليله هقضيها هنا فى اوضتى "
واتنهدت تنهيده كبيره وسرحت بخيالى لطفولتى واحلى سنين عمرى
عن كل حاجه حصلتلى
اوضتى دى فيها ذكريات كتير
ياما شافت دموعى وخنقتى .... شافت احلامى وتعبى فى دراستى .... شافت ضحكتى
وسمعت صوتها العالى ... وشافت ابتسمتى وكسوفى فى اول مكالمه بينى وبينه.... شافت
اول كلمت بحبك قولتهاله وانا مكسوفه وخايفه ... شافت احلامى فى بيتنا الصغير ... واحلامى
فى حياتى معاه ...شافت اول خناقه بنا ودموعى وهى نزله ... شافت ضحكتى على طفولته
معايا .... شافت وشافت وشافت كتير اوى
افتكرت لما كنت بقعد اذاكر واسهر لحد الفجر
افتكرت اصحابى وقاعدتنا فى اوضتى واحنا بنضحك ونهزر
وافتكرت مكلماتى مع اصحابى طول الليل ولا الحبيبه
افتكرت مريتى اللى ياما وقفت قدامها بالساعات
قومت من على السرير
وبصيت على قصصى المرصوصه وقاعدت اقلب فيها
معظمها كانت لاجاثا كريستى وصرخة الرعب والرجل المستحيل
وبعض الكتب لابراهيم الفقى وكريم الشاذلى
بصيت على بلورة الذكريات
بلوره ازاز فيها حاجات كتير غريبه ورقة شكولاته من اصحابى خاتم مكسور ورقه
قديمه مكتوب عليه شوية كلام اهبل ومتارخ بالتاريخ والساعه والمحاضره دلاية اول موبيل
جبته
ازاز مكسور لهديه قديمه اتكسرت
ذكريات فرحتنى بس وجعتنى اوى كمان
جبت اسكتش الرسم بتاعى
وقاعدت اقلب فى رسوماتى وشخبطتى وافتكرت قاعدتى على سريرى وانا برسم ملامحه
وجبت اسكتش رسم كان بينى وبين اصحابى فى كلام كتير وهزار وضحك كتير قاعدت
اقلب فيه والابتسامه على وشى
وفجاءه لقيت دمعه بيخه نزله
مش دمعة حزن على قد مهى دمعة اشتياق لايام كتير كانت حلوه وخلصت خلاص
مرحله من حياتى وللاسف انتهت
ومن بكره هبداء مرحله جديده بحياه جديده ببيت جديد بذكريات حلوه جديده
انا بجد مبسوطه انى هبقى مع حب عمرى ... بس
بس خايفه .... مخضوضه .... قلقانه.... حيرانه
ياترى هكون قد المسؤليه اللى انا دخله عليها
هقدر احقق احلامى والحياه المثاليه السعيد اللى انا بتمناها
عارفه ان مفيش حياه كامله ومش طول الوقت هبقى سعيده
عارفه اننا ممكن نتخانق ونزعل من بعض
بس انا عاوزه اكون زوجه صالحه على
قد مقدر
عاوزه نساعد بعض نعيش مبسوطين على قد مقدر
عاوزه نساعد بعض نرضى ربنا وندخل مع بعض وببعض الجنه
ورجع تانى اسال نفسى نفس السؤال " ياترى هبقى قد المسؤليه ؟؟"
انا عارفه انى كنت مرفها مش بعمل حاجه فى بيت بابا
وماما كانت بتشوف كل طلباتى ومن
وقت للتانى كنت بساعدها
بس فجاءه كده هبقى مسؤله عن زوج وبيت
هقدر اشيل المسؤليه دى لوحدى
انا حبه المسؤليه دى ... بجد حباها اوى
حبه اعمله اكله بايدى اهتم بمظهره ولبسه احافظ على جنتنا الصغير ونكبرها
بتعبنا واحنا ادينا فى ايد بعض
نكبر العش الصغير ونخليه قصر
مش بالشكل المادى على مهو بالشكل المعنوى
بجد حباها ... بس برده هبقى قداها !!!!!؟
ياربى دماغى هتنفجر من كتر التفكير
انا هحاول انام احسن
دخلت على سريرى تانى واخدت دبدوبى فى حضنى وغمضت عينى وانا بحاول ابعد اى
افكار فى دماغى عنى
حاولت استرخى واحاول انام
لحد مروحت فى النوم من كتر التعب
وفجاءه صحيت مخضوضه على زغروطه
" اصحى ياله يا عروسه"
" انا فين.... انا مين ...انا
ازاى .... عروسه "
اه صحيح
ده انا العروسه
تمت
تحفة بس الحلقة بتاعت فيروز ضرورى
ردحذف